Өнгөрсөн хугацаанд жирэмсэн болохгүй удсан болохоор маш олон эмнэлгээр явж оношилгоо, эмчилгээ, сэтгүүр эмчилгээ ч хийлгэж байсан. Ингээд л анх зүүн талын умайн гадуурх жирэмслэлт болж гуурсан хоолойгоо мэс заслаар авахуулсан. Харамсалтайн 6 жилийн дараа дахин нөгөө талдаа умайн гадуурх жирэмслэлт явагдаж хагарсаны улмаас Баянгол эмнэлэгт яаралтай дурангийн мэс засалд орж өөрөөрөө жирэмслэх ямар ч боломжгүй, зөвхөн үр шилжүүлэн суулгах аргаар жирэмслэх боломжтой болсон.

Судалж үзээд Солонгос явж үр суулгах эмчилгээ хийлгэхэд Монголоос бараг 2 дахин үнэтэй тусаж байсан (орчуулагч, 2 хүний тиз, байр, хоол гээд). Солонгост очоод ганцхан удаа оролдож үзэхээр, Монголдоо 2 удаа оролдож үзсэн яах аргагүй зөв байсан. Ингээд "Баянгол Эмнэлэг”-ийнхээ Үр Шилжүүлэн Суулгах Төвд эмчилгээ хийлгэж эхний оролдлогоор амжилттай болохоор барах уу, ЭХО-д 3 ихэр болох нь оношлогдсон. Миний амьдралын хамгийн сайхан мөчүүд...

Би жирэмсэний хяналтандаа тогтмол байж хүүхдүүдээ хэвийн тээж төрүүлсэн нь бүгд эмч нарын минь буян. Үр Шилжүүлэн Суулгалтын дараа эмнэлэгт хэвтэж байхдаа  бүтэлгүйтчихвий гэж их айдаг байсан. Гэхдээ эмч нартаа итгээд бүх зүйл болно, бүтнэ гэж бодохоор болдог юм байна. 

Эмч нар хуруу шилний хүүхдүүд гэж их анхаарсан, гол нь нөхөр бид 2 сэтгэл санаа тайван, хажууд тусалж дэмжих аав, ээж нар маань үргэлж хамт, урам өгч байсан тул итгэл дүүрэн байсан нь бас нөлөөлсөн болов уу.

Одоо 3 хүүтэй амьдрал утга учиртай, зорилготой болж гэр дүүрэн инээд хөөр бялхасан аз жаргалтай гэр бүл болсон. 

Нөхөр маань засварын газар ажилладаг, би өөрөө хувийн компанид нягтлангийн ажилтай. Амьдралд мөнгө биш, үр хүүхэд чухал юм билээ. 

Би анх жирэмсэн болоод тухайн үедээ буруу шийдвэр гарган үр хөндүүлснээс хойш 10 жилийн хугацаанд жирэмснээс ерөндгийн аргаар хамгаалж байсан. Нөхөр бид хоёр амьдралаа тэгшрэх үед хүүхэдтэй болно гэж бодож байсан маань алдаа болж, 2 жилийн өмнө дүүргийн эмнэлэгт очиж үзүүлэхэд ерөндөг нь шигдэж, үрэвсэлтэй болсон байсан. Бид улсын эмнэлэгт л хандаж эмчилгээ хийлгэх нь зөв гэж бодож байлаа, үнэхээр жирэмсэлж чадахгүй бол үр хүүхэд өргөж авахаас өөр гарцгүй болсон мэтээр ойлгож, дотроо их шаналж явсан. Миний дүү надад Баянгол эмнэлгийн /Юнимед Интернейшнл эмнэлэг/ тухай хэлж, жирэмсэн болж чадахгүй байгаа оношоо бүрэн тавиулаад, эмчилгээ хийлгэж хагалгаанд орох, үр цацлага эмчилгээ хийлгэх за бүр боломгүй бол үр шилжүүлэн суулгасан ч болно гэж зөвлөсний дагуу их л эргэлзэнгүйгээр ирж үзүүлж, олон шинжилгээ өгсөн. Тухайн үедээ хувийн эмнэлэгт хандах нь зөв эсэхдээ ч эргэлзэж байснийг нуух юун. Би оношилгооны дурангийн мэс засалд орж 2 талын үрийн суваг маань нарийсалтай гэдгээ мэдэж, эмчилгээг хийлгэсэн. Тухайн үедээ ийм тохиолдолд өөрөөрөө жирэмслэх магадлал 10% гэж хэлж байсан ч би энэ эмнэлгийнхээ чадварлаг олон жилийн туршлагатай эмч нарт  итгэж, эмчилгээгээ тууштай хийлгэж, нөхөр маань маш их сэтгэл санааны дэмжлэг үзүүлж байсан тул бид 2016 оны 03 сард 02-р төрж, хүүтэй болсон. Хүү маань эрүүл, бойжилт сайтай, цовоо нэгэн болж өсөж буйг нь хараад сэтгэлдээ үртэй болгож өгсөн Баянгол эмнэлгийн Үр шилжүүлэн суулгах төвийн мэс заслын хамт олон, эмч нартаа байнга баярлаж явдаг билээ. 

2016.05.31

Бид гэрлээд 5 жил хамт амьдарч байгаа боловч хүүхэдтэй болохгүй байсаар Баянгол эмнэлгийн Хадбаатар эмчид үзүүлж нөхөр бид 2 олон төрлийн шинжилгээ, оношилгоонд хамрагдаж бүгд хэвийн гарсаар шалтгаан тодорхойгүй үргүйдэл гэсэн онош тавьсан. Ингээд эмчийн зөвлөсний дагуу үр цацалт эмчилгээнд  (IUI) эхний удаа орж амжилттай болоогүй ч хэд хэдэн удаагийн оролдлогоор бүтдэг гэдгийг сонсоод итгэл найдвараа алдалгүй 3 дахь удаагаа ороод амжилттай болоод зогсохгүй 2 ихэр жирэмсэн болсон. Энэ мэдээг сонсоод нөхөр бид 2 маш их баярласан. Одоо 2 хөөрхөн ихэр хүүтэйгээ аз жаргал дүүрэн сайхан амьдарч байна. Баянгол эмнэлгийн хамт олондоо цаашдын ажилд нь өндрөөс өндөр амжилт хүсье. 

2015.12.08

Би 6 жилийн  турш хүүхэдтэй болж чадалгүй явсаар Баянгол эмнэлэгт ирж эмчийн зөвлөмжийг авч дурангийн мэс заслаар умайн хоргүй хавдар авах давхар гуурсан хоолойнуудаа шалгуулах хагалгаанд орж ердөө 2 хоног эмнэлэгт хэвтээд гарсан. Анх хагалгаанд орно гэхэд их айж байсан ч эмч маань зовиур бага, айх зүйлгүй, ажилаа алдахгүй 2 хоноод л гарна гэдгийг сонсоод тайвширсан, үнэхээр надад зовиур байхгүй, шарх бас хурдан эдгэрсэн, маш жижиг соривнууд л үлдсэн, эмчийнхээ хяналтанд байж хэдэн сарын турш эм ууж, эмчилгээгээ үргэлжлүүлсээр, тэвчээртэй хүлээсээр 10 сарын дараа жирэмсэлж хөөрхөн ханхүүтэй болсон.

Бид хагалгаанд ороод л хүүхэдтэй болно гэж төсөөлж байлаа гэтэл бас дахиад хүлээх хэцүү байсан ч эмчид хандахгүй 6 жил явсан байж эмчтэй хамт ядаж 6 сар хүлээх тэвчээр гаргах хэрэгтэйг ойлгосон. Хүсэл мөрөөдөл итгэл найдвар бүхнийг биелэлээ олоход минь маш том гарцыг нээж өгч амьдралд минь аз жаргал баяр хөөр гэгээн бүхнийг бэлэглэсэн танай эмнэлгийн хамт олонд маш их баярлаж явдаг шүү. Та бүхний цаашдын ажилд амжилт хүсье. 

2015.08.20

Би төрөлхийн зүрхний гажигтай төрсөн. Эмч нар намайг хүүхэд төрүүлж болохгүй эрүүл мэндэд чинь эрсдэлтэй гэж зөвлөдөг ч би зөрсөөр жирэмсэн болж зүрх минь дийлэхгүй эрүүл мэндийн шалтгаанаар таслуулсан. Намайг хүүхэд төрүүлж болохгүйг нөхөр маань ойлгодог байсан ч бид үр хүүхэдтэй болохыг туйлаас их хүсдэг байлаа. Хүүхэд үрчилж авах талаар ч ярилцаж үзсэн гэхдээ кинонд гардаг шиг тээгч эхтэй үр шилжүүлэн суулгах эмчилгээнд хамрагдаж өөрсдийн удам залгах үртэй болох арга байдгийг олж мэдээд Баянгол эмнэлэг /Юнимед Интернейшнл/-т Хадбаатар эмчид хандсан. ҮШСТөвийн хяналтанд орж хадам эгч маань бидэнд тээгч эх болохыг зөвшөөрч үр шилжүүлэн суулгах эмчилгээнд 2014 оны 12 сараас эхлүүлсэн. Ингээд бид хөөрхөн охинтой болсон. Та нартаа ажлын өндөр амжилт хүсье. 

2016.03.26

Үр шилжүүлэн суулгах төвийн хамт олон эмч, сувилагч та бүхний буянаар өнөөдөр манай гэр бүл эх үрсийн баярыг дуу хууртай, инээд хөөртэй, аз жаргал дүүрэн анх удаа тэмдэглэж байна. 2015 оны 02 сард үр шилжүүлэн суулгаад амжилтгүй болсон ч та бүхний ачаар 2 дахь удаагийн (04 сард) оролдлого маань амжилттай болж би 41 настай ч эрүүл саруул хүүтэй болсон азтай хүн. 

Миний амьдралын утга учир , аз жаргалыг өгсөн Р.Хадбаатар эмч болон бусад эмч, сувилагч Та бүхэнд эх үрсийн баярын мэнд хүргье. 

Улам өнөр өтгөн болж олон гэр бүлд туслаарай. 

2016.06.01

Одоогоос яг 2 жилийн өмнө Баянгол эмнэлэгт сүүлийн итгэл найдвар гэж бодон орж ирж билээ. Бид Хадбаатар эмчид үзүүлж “Болно” гэдэг үгийг сонсоод маш их баярласан. Юу гэж тайлбарлаж зүйрлэхээ ч мэдэхгүй байсан. Маш их эмчилгээ хийлгэж эм тариа, мөнгө гээд бүхнээ зарцуулсан. Гэхдээ энэ бүхний эцэст бид хоёр ихэр хүүтэй болж чадсан. 

Бүхнээс үнэтэй зүйл бол үр хүүхдийн инээд цалгисан  гэр бүл юм шүү. Хадаа эмчдээ маш их баярлалаа. 

2015.06.01 

Мянга мянган хүүхдийн аз жаргалыг бэлэглэгч 

Үр шилжүүлэн суулгах төвийн хамт олондоо маш их баярлалаа. 

Сайн сайхан бүхнийг хүсье. 

“Хүн бүтээх шиг буян” өөр хаана байх билээ. 

Хорвоод нар байхад яагаад заавал үүл байдаг юм. 

Сарнай байхад яагаад заавал навч байдаг юм. 

Жаргал байхад яагаад зовлон оршдог юм. 

Халуун нарыг халхлах гэж үүл байдаг юм. 

Сайхан сарнайг амьлуулах гэж навч нахиалдаг юм. 

Жаргалыг амттай болгох гэж зовлон оршдог юм. 

2015.06.01

Бид ханилаад 9 жил болсон ч үр хүүхэдтэй болоогүй. Бид Энэтхэг, Солонгос, Германд нийтдээ 4 удаа үр шилжүүлэн суулгах эмчилгээнд орж бүтэлгүйтсэн. Ингээд сэтгүүлээс Монголд Баянгол эмнэлгийн тухай мэдээлэл, хаягийг олж хараад бид энэ эмнэлэгт сүүлийн удаагийн итгэл найдвар тээж үзүүлэхээр шийдээд Хадбаатар эмчтэй уулзсан.  Үр шилжүүлэн суулгах эмчилгээнд орж эхний удаагийн оролдлогоор л ийм сайхан хүүтэй болсон. Эхнэр бид 2 танай хамт олон болон Р.Хадбаатар эмчид  үнэхээр их баярлаж талархаж байна. 

2014.03.29